Mogaung Ginwang, Nam Sheng bum kaw gasat gala majan byin
Jinghpaw Mung, Mogaung Ginwang, Nam Sheng bum kaw dap jahkrat nga ai Tatma (33) kata na HK.M.Y (12) hpyen hpung ni hte KIA Dap Ba (9), Dap Dung (44) kata na hpyen hpung ni March shata 12 ya jahpawt hkying 3:00am aten hta kalang, hkying 5:00am aten kaw nna hkying 8:14am aten du hkra kalang laja lana gasat gala majan byin ai re hpe chye lu ai.
“Moi gaw Nam Sheng bum kaw anhte shanglawt ni dung ai shara re. Raitim Myen hpyeng hpung ni shara la kau ai lahkawng ning daram na sai re. Ya gaw anhte shanglawt ni bai sa gap la ai ga rai nga ai” nga nna Salang langai tsun dan ai.
Nam Sheng bum kaw gasat gala majan byin ai majaw mungshawa ni Nam Sheng buga KBC hpung wang hta majan koi yen shanu ai raitim shani hkying 11:00am aten kaw nna tiang dum nta de bai nhtang wa lu sai lam, asak kaba sai gumgai dingla ni sha ngam taw sai lam buga masha ni kaw nna chye lu ai.
Jahpawt hkying 5:00am aten kaw nna hkying 8:14am aten du hkra byin ai majan hta Kamaing kawn 120 sinat kaba hte numdaw 13 lang daram gap bang ya ai rai nna Helicopter nbung li lahkawng hte mung htim gasat ai lam nga ai re.
Myen hpyen dap ni kawn kamaing kaw nna sinat kaba hte mungmare masha ni nga ai shara de hkrup mara gap bun ai majaw Kamaing mare masha ni sinat pala gap hkra hkrum ai lam nga ai re hpe chye lu ai.
“Asak 22 ning re ai Jan Bawk San gaw myi kaw hkra machyi ai. Asak 6 ning re ai shayi Zawng Naw magyi pawt kaw hkra ai, Asak 14 ning re ai Shayi Ja Tawng (shr) Lin Lin Aye gaw du kaw hkra machyi nna Asak 12 ning re ai Shadang Brang Ja (shr) Han Min Htek gaw baw kaw hkra ai re.” nga nna mare masha langai tsun dan ai kaw nna chye lu ai.
Hpyen n gun 40 daram nga ai Tatma (33) kata na hpyen hpung ni mung shani hkying 10:30am aten hta Hpakant Namya kaw nna 60mm sinat kaba hte mare masha ni nga ai shara de numdaw (6) lang hkrup mara gap bang ya ai lam nga ai majaw Namya mare masha ni mung grai hkrit tsang nga ai re.
March shata 11 ya shana hta mung Kamaing lam Nam Sheng bum kaw shara jahkrat nga ai Hk.M.Y (12) kata na hpyen n gun (40) daram nga ai hpyen hpung ni gaw Namsi En hkahku maga de sinat kaji kaba hte shana hkying 8:30pm aten kaw nna hkying 9:40pm aten hta du hkra numdaw 5 lang gap bang ai lam nga ai re hpe mung matut chye lu ai.
