Pyi Tu Tsit dap hpe KIA ni sa htim gap
Sinna Ginwang Ginjaw, KIA Masat (2) Dap Ba, Masat (14) Dap Dung ginra Jahtu Zup, Tsan Pya mare kaw dap jung tawn ai Pyi Tu Tsit dap hpe March shata 15 ya jahpawt hkying 2 hte hkying 3:00am aten laman KIA ni sa htim gap ai lam na chye lu lu ai.
Pyi Tu Tsit ni hpe ya nga ai shara kaw na yen ya na matu, KIA Dap Dung (14) ni tsun da ai, bai nna lai wa lai sa mungshawa ni hpe mung san jep ai lam ni galaw ai majaw rai sam ai, nga nna ginra shi sawk ni tsun ai.
Pyi Tu Tsit ni gaw dai ni March shata 15 ya shani hta shara htawt sit mat sai lam chye lu ai.
Jahtu Zup kaw dap jung shara jahkrat nga ai Myen Hpyen Dap, Hk.L.Y (297) dap ni mung, gasat gala majan byin ai shara de sinat kaba hte jahpawt hkying 3 kaw na hkying 5 jan aten du hkra gap sharu bun ai lam chye lu ai.
Myen hpyen dap ni kawn sinat kaba hte gap sharu bun ai hta mungshawa ni kaw hkra hkala ai lam gaw nnga ai, Tsan Pya mare na mungshawa nta langai kaw gaw, wang nhpan hte nta shakum lapran kaw pala si langai wa hkrat ai raitim kapaw ai lam nnga ai re.
Ya aten Myen Hpyen Dap ni gaw, Danai Lidu lam mayan hta hpyen shamu shamawt lam ding yang galaw nga ai rai nna, KIA hte Myen Hpyen Dap ni 2021 ning February shata kaw nna gasat gala majan matut manoi ngu na bai byin nga ai hpe chye lu ai.
