KIA hte Myen Hpyen Dap ni gasat gala majan byin ai majaw, kahtawng 4 na mungshawa ni hpyen koi yen hkrum

KIA Masat (1) Dap Ba, Masat (4) Dap Dung hpyen hpung ni hte Njang Yang Ginwang, Gwi Htau mare makau kaw dap jung shara jahkrat nga ai Myen Hpyen Dap Hk.L.Y (124) hpyen hpung ni Gwi Htau mare makau kaw March shata 15 ya shana hkying 5:30pm aten kaw nna gasat gala majan byin ai majaw, March shata 16 ya jahpawt majan byin ai grup yin kaw na mungshawa ni hpyen koi yen hkrum ai lam na chye lu ai.

Gasat gala majan a majaw, hkrit tsang nna Gwi Htau mare, Tangbau Yang mare, Sani Tu Yang hte Hpatsip Zup mare kaw na mungshawa marai 200 jan (htinggaw 50 daram) gaw Myitkyina hpyen yen ginra de yu wa na matu hkyen lajang nga ai raitim, Myen Hpyen Dap M.P.Hk kaw nna shalai na ahkang njaw ai majaw, ya aten Tanghpre RCM nawku jawng wang kaw gan shanu shingbyi nga ai lam, Tangbau Yang mare na salang langai tsun ai.

Majan a majaw mungshawa ni hkra hkala ai lam nnga ai raitim, Ma kaji ni hte dinggai dingla ni hprawng koi yen ai hta jam jau hkrum ai hte tinang a buga ginra hta shim lum ai hku kanbau bungli galaw lu galaw sha lu na matu ra sharawng ai lam salang wa matut tsun ai.

Tanghpre mare de hprawng koi yen wa ai hpyen yen ni gaw, laiwa sai ten hpyen majan a majaw Myitkyina Pa La Na, Trinity hpyen yen camp ni hta shanu shingbyi nga ai rai nna, ahkaw ahkang nga ai ten tinang buga makawp maga let kan bau bungli galaw lu galaw sha na matu tinang a mare de wa shanu shingbyi nga ai mungmare masha ni re lam chye lu ai.

Photo; fb