Tanghpre mare de koi yen wa ai hpyen yen mungshawa ni Myitkyina hpyen yen dabang de du shang sai
KIA hte Myen Hpyen Dap ni gasat gala majan byin ai majaw, Tanghpre RCM nawku jawng wang de gan koi yen wa ai, hpyen yen mungshawa ni March shata 16 ya shana hkying 10:00pm aten daram hta, Myitkyina Pa La Na hpyen yen dabang de du shang sai lam na chye lu ai.
Tanghpre mare de koi yan wa ai hpyen yen mungshawa marai 145 hpe Myen Hpyen Dap M.P.Hk kaw nna tinang a hpyen yen camp de shalai na ahkang njaw ai raitim, Peace Talk Creation Group (PCG) ni hte dabang lit nga ai salang ni Myen hpyen dap hpe sa du jahkrup ai hpang, tinang a hpyen yen camp de bai nhtang wa lu ai lam, hpyen yen mungmasha langai tsun ai.
Ndai hpyen yen mungshawa ni gaw, laiwa sai 2018 ning hpyen majan a majaw, Myitkyina Pa La Na (RCM) hpyen yen camp, Trinity hpyen yen camp ni de wa shanu nga ai hpyen yen mungmasha ni rai nna, 2019-2020 ning hta tinang mare buga makawp maga let kanbau bungli galaw lu galaw sha na matu wa shanu shingbyi nga ai ten, March shata 15 ya shana KIA hte Myen Hpyen ni gasat gala majan bai byin wa ai majaw, kalang bai hpyen koi yen wa ai mung mare masha ni rai nna, Gwi Htau mare, Tangbau Yang mare, Sani Tu Yang hte Hpatsip Zup mare na mungshawa ni re hpe chye lu ai.
Photo Credit; Da Rock
