Nam Maw hte Maw Lakying lapran na Myen Balik Dap hpe KIA ni sa htim gap
Hpakant Ginwang, KIA Masat (9) Dap Ba, Masat (6) Dap Dung ginra, Nam Maw hte Maw Lakying lapran kaw dap jung nga ai Myen Balik Dap hpe March shata 18 ya jahpawt hkying 1:00am-2:00am aten laman hta KIA hpyen hpung ni sa htim gap ai lam na chye lu ai.
Myen Hpyen Dap hte Balik Dap ni gaw, Gumshem Myen Hpyen Dap hpe ninghkap shawa n-gun madun ai mungshawa ni hpe dingbai dingna jaw ai majaw ya na zawn sa htim gap ai re lam, shawng lam na lit nga ai salang langai tsun ai.
Ya aten Hpakant KIA Masat (9) Dap Ba ginra ni hta Myen Hpyen Dap ni gaw shanhte lang ai hpyen Mawdaw hte nre ai sha, mungshawa ni jawn lang ai Mawdaw ni hte malu masha, hpyen n-gun htaw ginlen ai lam galaw nga ai majaw, KIA Masat (9) Dap Ba kaw nna March shata 16 ya shani hta sadi jaw ndau shabra laika shapraw da ai lam salang wa matut tsun ai.
Dai sadi jaw ndau laika hta nta jawn Mawdaw, hkrun lam hkawm masha htaw Mawdaw hte company Mawdaw ni yawng gaw, Gumshem Myen Hpyen Dap ni a hpyen arung arai, malu masha ni htaw ginlen ya ai lam, Plastic Muka magap nna hkawm sa ai lam n galaw na matu sadi jaw laika hta ka da ai.
Ya aten hta Myen Hpyen Dap ni gaw KIA ni dap jung shara jahkrat nga ai shara shagu de hpyen shamu shamawt ai lam matut manoi galaw nga ai majaw, February shata kaw nna Mungmyit Sinli Ga (Kachin Sub-state) ginra hte Jinghpaw Mung ginra ni hta, gasat gala majan bai byin nga ai re.
