Shawa n-gun madun ai kaw rim hkrum ai mungshawa ni marai 19 hpe bai dat ya

Myitkyina, Namti Muklum kaw Gumshem Myen Hpyen Dap hpe ninghkap shawa n-gun madun ai mungshawa ni marai (19) hpe Myen hpyen la ni hte Balik ni kawn March shata 22 ya jahpawt hkying 9:00am aten rim woi mat ai hta, mare salang ni hte buga hpung sara ni wa tsun jahkrup ai majaw, hkying 11:30am aten bai dat ya sai lam na chye lu ai.

Rim hkrum ai mungshawa ni gaw, la (7) hte num (12) re, Lambraw Yang daw de n-gun madun na matu masha hpawng chyawm hkyen wa ai kaw Myen Balik ni na nna sa rim la ai, rim hkrum ai kaw na salang Naw Awng hpe gaw lata du, gayat abyen ai re lam, Namti mare na salang langai tsun ai.

“Mare salang ni hte buga hpung sara ni wa tsun jahkrup ai. Namti mare masha ni mung Balik Dap kaw sa hpyi shawn ai majaw bai dat ya sai re. Namti mare kaw Myitra n-gun madun lamang galaw ai hta, shawng nnan lang rim hkrum ai re” nga nna tsun ai.

Myen Hpyen Dap hte Balik Dap kawn n-gun madun shanglawm ai mungshawa ni hpe hkan rim adup zingri ai lam galaw ai majaw, mungshawa ni hkrit tsang ai lam nga ai raitim, mungshawa yawng ban dung du mayu taw hkrai re majaw, ninghkap n-gun madun lamang hpe matut galaw sa wa na re lam chye lu ai.

Ya aten Mungdan ting hta, Gumshem Myen Hpyen Dap hpe nra sharawng ninghkap shawa n-gun madun lamang ni hpe ladat amyu myu shaw let shani shagu galaw nga ai lam chye lu ai.

Photo Credit; KNG