Kachin-Sub-state ginra hta Myen hpyen dap hte KIA hpyen hpung ni gasat gala majan byin
Mungmyit Sinli Ga (Kachin-Sub-State), KIA Masat (6) Dap Ba, Masat (36) Dap Dung ginra kaw March shata 22 ya jahpawt hkying 7:25am aten hta Myen hpyen dap Hk.L.Y (287) kata na hpyen hpung ni hte KIA hpyen hpung ni gasat gala majan byin ai lam shawng lam shi sawk shana wa ai kaw na chye lu ai.
“KIA Dap Dung (36) kata na hpyen hpung ni shara jahkrat nga ai de Hk.L.Y (287) kata na n gun (100) daram nga ai hpyen hpung ni gaw hpyen man lahkawng hte hpyen shamu shamawt htu shadut lung wa ai majaw ninghkap shingla gasat gala majan byin ai re” nga nna shawng lam na salang langai tsun ai.
Myen hpyen dap ni kawn sinat laknak kaba hte gap shadam ai majaw mungmare masha ni galaw tawn ai kumshu yi hkan hkrat ai lam nga ai rai nna mungshawa langai pala hkra machyi hkrum ai re.
Mungmyit Sinli Ga (Kachin-Sub-state) ginra hta gasat gala hpyen majan matut manoi byin nga ai re hte hpyen majan shamu shamawt ai lam mung lahkawng maga shada maja nga ding yang re hpe mung chye lu ai.
