Myitkyina Muklum kata silent strike galaw

Myitkyina Muklum kata March shata 24 ya shani Democracy hpe ra sharawng ai mungshawa ni yawng shinggan de pru hkawm sa ai lam n galaw ai sha, gat seng ni yawng pat nna, tinang a dum nta kaw nga let, Gumshem ai Myen Hpyen Dap hpe ninghkap nra sharawng ai silent strike galaw nga ai lam, ginra masha ni tsun shana wa ai kaw na chye lu ai.

Gat seng hpaw hkyen wa ai mung masha nkau ni hpe gaw, Myen Hpyen Dap hte Balik Dap ni kawn shim lam la ya na matu tsun wa ai majaw, gat dut ai ni kajawng nna yawng bai pat kau ai lam nga ai.

March shata 25, 26 ya shani hta gaw gat seng ni yawng bai hpaw na rai nna, March shata 27 ya shani gaw Myen Hpyen Dap masat ninghtoi re majaw, gat seng ni yawng bai pat nna mungshawa yawng tinang a dum nta kaw sha nga let silent strike galaw na re lam, Myitkyina ginra na salang langai tsun ai.

Laiwa sai March shata 22 ya shani kawn Myitkyina, Mugawng, Mu Nyin hte kaga Muklum shara shagu hta mungshawa ni hpe lam amyu myu hku nna dingbai dingla jaw ai lam ni byin wa yang, ndai gaw Myen Hpyen Dap ni galaw ai nre, KIA ni galaw ai she re ngu ai laika pyen dau ni hkan shakap da ai majaw, mungshawa nkau hkrit tsang nga ai rai nna, mungshawa nkau ni gaw, ya na zawn galaw wa ai gaw, KIA ni nre Myen Hpyen Dap ni she re ngu nna laika pyen dau ni bai hkan nhtang shakap da ai lam, salang wa matut tsun ai kaw na chye lu ai.

Ya aten Myen Mungdan shara shagu hta, Gumshem Myen Hpyen Dap hpe ninghkap nra sharawng ai silent strike lamang ni galaw nga ai rai nna, ginra nkau ni hta gaw ladat amyu myu shaw let n-gun madun lamang ni galaw nga dingyang re lam na chye lu ai.

Photo Credit; Myusha Pyen U