KIA Dung ( 27 ) ginra hta Myen hpyen hpung hte laja lana gasat majan byin
Sinpraw Ginwang Ginjaw, KIA Dap Ba ( 3 ), Dap Dung ( 27 ) ginra kaw shamu shamawt nga ai Hk.L.Y ( 236 ), Hk.M.Y ( 319, 601 ) Dap na pawnghpawm Myen hpyen hpung ni, April
praw, 7 jahpawt manap hkying 4:45am aten daram hta KIA Dap Dung ( 27 ) hpyen hpung ni a Sindi bum post hpe wa htim gap ai kawn laja lana gasat gala majan byin ai lam na chye lu ai.
Dai hpawt hkying 4:45am aten daram kawn hkying 9:30am aten laman gaw, Sindi bum kaw shawng byin ai, dai hpang hkying 10:15am hte hkying 1:30pm laman gaw Daga mare dingsa, Dagyen hkyet mayan hku numdaw 2 lang bai gaphkat ai, hkying 2:20pm aten kaw nna, daina de hkying 5:15pm aten daram du hkra numdaw 3 lang ngu na ndai grup yin hta sha, gasat majan byin ai re lam, ginra shisawk ni tsun ai kawn chye lu ai.
Myen hpyen dap ni gaw, Ayawng Pa ntsa bum hte Madang Yang maga kawn laknak kaba hte gap bun ai lam mung na chye lu ai.
April praw 5 ya shani hta mung, Hk.L.Y ( 236 ) Dap ni hte KIA Dap Dung ( 27 ) hpyen hpung ni, Gadung Kadit hkaraw kaw ang katut gasat poi byin lai sai re.
