(18) lang na Kutkai ginwang Uphkang Kasa Hpawng hte (3) lang na Kutkai ginwang Hpung Shawa Zuphpawng galaw
Photo Credit; KGZ Mu Na Hpu-awn
Lahta Sammung, Mungmyit Sinli Ga (Kachin-Sub-state) Kutkai Ginwang, Namhpakka Buga kaw (18) lang na Kutkai ginwang Uphkang Kasa Hpawng hte (3) lang na Kutkai ginwang Hpung Shwa Zuphpawng kaba hpe March shata 22 ya shani kaw nna 25 ya shani du hkra nhtoi 3 ya tup galaw la lu sai lam chye lu ai.
“Zuphpawng hta gaw komiti ni galaw la lu sai jahpan ginchyum nna matut galaw sa wa na magam bungli masing masa shamu shamawt lam, sharin achyin lamang ni hpe shawa kaw tang madun ai hku re. Bai nna bungli kaba gaw mu gun ningnan galai shatsam ai lamang mung lawm ai hku re.” nga nna Kutkai Ginwang Ningbaw Usa Rev.Lahkum Lahpai Hkun Nawng tsun ai.
Galai shatsam shagrin da lu sai mu gun ningnan ni gaw Ningbaw magam lit hpe Kutkai ginwang Kawnghka Buga hpung kaw na Rev.Sumlut Dan Awng, Ningtau Ningbaw lit hkam hpe Loihkang buga hpung kaw nna Rev. Dumdaw La Jun, Amu madu magam lit hpe Kutkai Buga hpung kaw na Rev.Maran Zau Man hte ngam ai mu gun magam lit ni hpe mung galai shatsam shagrin da lu sai re.
Photo Credit; KGZ Mu Na Hpu-awn
kasa hpawng hte hpung shawa zuphpawng hta mu gun bungli hte ningbaw ningla galai shatsam ai rai nna mu gun ladaw hpe mali ning masat da ai re.
Kutkai ginwang hpe laiwa sai 2009 ning kaw nna hpaw ninghtan hpang wa ai rai nna langai lang na hpung shawa zup hpawng hpe Tamunye buga hpung hta galaw la lu sai. Lahkawng lang na hpung shawa zuphpawng hpe gaw 2017 ning hta Kawnghka buga hpung kaw galaw la lu sai re.
Kutkai ginwang hta buga hpung (28) shang lawm nga ai re hte buga shagu na kasa ni, hpung ningbaw ni, amu madu ni hte hpung shawa yawng (162) tup sa du shang lawm bawng ban lu lu sai re hpe mung chye lu ai.
