KIA hte Myen Hpyen Dap ni gasat poi laja lana byin

Ginjaw Ginra Ginwang Ginjaw, KIA Masat (5) Dap Ba ginra kata, Alaw Bum hte Pan Tsun Bum, Hpun Pyen Bum hte Shan Tum Bum ni hta, KIA hte Myen Hpyen Dap Hk.M.Y (387) hpyen hpung ni March shata 24 ya shana maga 5:30pm aten kaw nna March shata 25 ya jahpawt 4:10am aten du hkra gasat poi laja lana byin ai lam chye lu ai.

KIA Masat (5) Dap Ba kata, KIA Masat (30) Dap Dung ni hte Masat (19) Dap Nawng Dap Dung hpyen hpung ni gaw, Alaw Bum Myen Hpyen Dap shawng lam post shara 3 hpe sa htim gasat ai rai nna, March shata 25 ya shani du hkra dai shara 3 hpe KIA hpyen hpung ni zing madu da lu sai lam, shawng lam na lit nga ai salang langai tsun ai.

Ya aten KIA hte Myen Hpyen Dap lahkawng maga hpyen shamu shamawt lam dingyang galaw nga ai majaw, gasat poi matut manoi naw byin wa mai ai lam, shawng lam shisawk ni tsun maram da ai re.

Laiwa sai February shata 11 ya shani kaw nna Myen Hpyen Dap maga kawn Mungmyit Sinli Ga (Kachin Sub-state) ginra ni hta, hpyen shamu shamawt htu shadut ai lam dingyang galaw wa ai majaw, Mungmyit Sinli Ga hte Jinghpaw Mung ginra ni hta ya aten du hkra gasat poi matut manoi byin nga ai re.