KIA Masat (1) Dap Ba, Masat (2) Dap Ba hte Masat (8) Dap Ba ginra ni hta gasat gala majan byin
KIA Masat (1) Dap Ba, Masat (2) Dap Ba hte Masat (8) Dap Ba ginra ni hta Myen hpyen hpung hte KIA ni gasat gala majan matut byin nga ai lam na chye lu ai.
April shata praw 1 ya shani hkying 10:45am aten kaw nna hkying 11:15 am aten du hkra KIA Dap Dung (11) ginra, Dum Bung mare maga kawn shamu shamawt yu wa ai, Myen Hpyen Hk.M.Y (390) Dap na hpyen n gun (60) daram hte KIA ni Ting Rat Hka kaw hkap gap ai kawn gasat gala majan byin ai re lam, shawng lam shi sawk ni shana wa ai.
KIA Masat (1) Dap Ba ginra, Daru Hka makau kaw dap jung shara jahkrat nga ai Myen Hpyen Hk.L.Y (37) Dap ni hpe KIA Dap Dung (22) hpyen hpung ni April shata praw 1 ya shana maga hkying 4:30pm aten hta sinat kaba hte sa gap bun ai hpang, Myen hpyen ni mung 60mm hte bai nhtang gap ai hta Daru Hka mare na Jan. Kayun Du Roi a la hkra lata lahpum kaw pala hkyep hkra hkala ai lam na chye lu ai.
Marsh shata 31 ya shani hta mung, KIA Masat (1) Dap Ba, Masat (7) Dap Dung ginra, Sum Pyi Yang hte Shing Kap Bum lapran Gagam hka grup yin shamu shamawt nga ai Hk.L.Y (138) Dap na hpyen hpung hte KIA ni gasat poi byin ai re.
March shata 31 ya shani hta sha, KIA Masat (8) Dap Ba Masat (35) Dap Dung ginra, Maw Han maga kawn lung wa ai Myen Hpyen Hk.L.Y (16) Dap na hpyen la htaw ai mawdaw (5) hpe, shana maga hkying 4:00pm aten hta Nam Hkyi Maw lawu kaw KIA ni hkap gap ai kawn gasat bai byin ai.
Gasat poi byin ai hpang Myen Hpyen ni gaw, Jet Figther nbung li (2) hte KIA Masat (8) Dap Ba ni shara jahkrat nga ai kaw bawm wa jahkrat, wa gap bun ai lam chye lu ai.
