KIA masat (11) Dap Dung ginra hta Myen hpyen dap ni hte gasat poi byin
Masat (2) Dap Ba, Masat (11) Dap Dung ginra, Namti hte Mayan lapran ( ေက်ာက္ေတာင္ ) shara kaw April shata praw 3 ya shani hkying 11:00am grup yin laman KIA Masat (11) kata na hpyen hpung ni hte dap mying nchye lu ai Myen hpyen hpung ni gasat gala majan byin ai lam chye lu ai.
“Myitkyina maga kawn shamu shamawt lung wa ai Myen hpyen dap ni a hpyen mawdo mali hpe Dung (11) kata na hpyen hpung ni hkap kapaw ya nna jahkring mi gasat gala majan byin ai re hpe chye lu ai.” nga nna Namti mare masha langai tsun dan ai.
April shata praw 3 ya shani hta mung Ginsi Byuha kawng kaw dap jung nga ai Myen hpyen dap ni kaw nna 120mm laknak kaba hte Dap Ba (9) maga de kalang, Dap Dung (6) ni shara jahkrat nga ai maga de kalang gap bang ya ai lam nga ai re hpe shawng lam na salang langai tsun dan ai.
Ya aten hta Masat (9) Dap Ba, Masat (44) Dap Dung ginra hta Myen hpyen dap kaw nna shani shagu hpyen n gun, malu masha ni hte nbung li jak sau ni hpe mung ding yang shalai bang nga ai re lam shawng lam na salang langai matut tsun dan ai kaw nna chye lu ai.
