Bang Hka lawu Loi Lem lam numshe kaw KIA hte Myen hpyen ni laja lana gasat gala majan byin
Mungmyit Sinli Ga (Kachin Sub-state), KIA Masat (10) Dap Ba, Masat (17) Dap Dung ginra, Bang Hka lawu Loi Lem lam numshe kaw April shata praw 4 ya shani hkying 12:20pm aten hta KIA hte Dap mying n chye ai Myen hpyen ni laja lana gasat gala majan byin ai lam chye lu ai.
“Myen hpyen ni gaw, Mung Yaw maga kawn anhte kaw na ni hkap nga ai kaw pru wa ai majaw, na yi chyen mi daram laja lana gap hkat ai” nga nna shawng lam kaw na lit nga ai Salang langai tsun dan ai.
Myen hpyen dap gara ni re hkrak rai nlu ai sagawn nga ding yang re. N gun gaw 120 daram re, shanhte naw shamu shamawt shang wa yang majan naw byin wa na re, shanghte hta she hkan ai anhte gaw galoi mung ready re. Nga nna Salang wa matut tsun ai.
KIA Masat (10) Dap Ba ginra hta hpyen manam shamu shamawt shang wa ai zawn re nnga ai raitim, dai ginra kaw Dapnu 99 hte Ts.K.Hk (10) kata Myen hpyen n gun 400 daram shamu shamawt nga ai re.
KIA hte Myen hpyen dap ni February shata kaw nna shani shagu ngu na gasat gala majan byin nga ai sha n ng, Kayin mungdaw ginra ni hta mung, KNU hte Myen hpyen ni gasat gala majan byin nga ai hpe mung chye lu ai.
