Namgut mare makau kaw Myen hpyen hpung ni hpe KIA ni bawm hte hkap shingla gasat
Mungmyit Sinli Ga (Kachin Sub-state) KIA Masat (6) Dap Ba, Masat (9) Dap Dung ginra, Namgut mare makau kaw April shata praw 5 ya jahpawt hkying 10:30am aten daram hta Kutkai, Nawng Swi Pa kawn lung wa ai Myen hpyen hpung ni hpe KIA ni bawm hte hkap shingla gasat dat ai re lam na chye lu ai.
Dap mying hkrak tup n chye lu ai pawnghpawm Myen hpyen hpung n-gun 80 daram gaw KIA ni nga ai makau grup yin hkan shamu shamawt shang wa ai majaw, KIA Masat (9) Dap Dung, Kung (1) hpyen hpung ni hkap shingla gasat ai re lam, shawng lam na lit nga ai salang langai tsun ai.
Ya aten Mungmyit Sinli Ga ginra hta, Myen Hpyen Dap kaw nna KIA ni dap jung nga ai shara de laja lana htu shadut ai lam nnga ai raitim, kata lam hpyen shamu shamawt ai lam dingyang galaw nga ai majaw, KIA hte Myen Hpyen Dap ni gasat poi matut naw byin wa mai ai lam, salang wa matut tsun ai.
April shata praw 4 ya shani hta mung, KIA Masat (10) Dap Ba, Masat (17) Dap Dung ginra, Bang Hka lawu Loi Lem lam numshe kaw KIA hte Myen hpyen hpung ni laja lana gasat gala majan byin ai lam chye lu ai.
