Myen hpyen dap ni sinat laknak kaba hte hkrup mara gap ai pala si ni mung mare makau kaw hkrat
Hpakant ginwang, Wa Ra Zup-Bangkawk mare mayan kaw April shata praw 5 ya shana hkying 8:00pm hte hkying 9:00pm aten laman hta Jahtu Zup mare kaw dap jung nga ai Hk.L.Y (297) ni kaw nna mungshawa ni nga ai shara de sinat laknak kaba hte hkrup mara gap bang ya ai majaw mare masha ni grai hkrit tsang nga ai lam chye lu ai.
Jahtu Zup mare kaw nna mying nchye lu ai sinat laknak kaba hte manga lang daram, hkrup mara gap bang ya ai rai nhtawm Bangkawk mare mayan kaw hkrat ai raitim mung mare masha ni kaw hkra hkala ai lam nnga ai re.
“shanghte gaw shanhte makau grup yin hkan hkrit nna shanhte a shim lam a matu hkrit nna gap ai re ngu mu mada ai. Kadai ma sa gap ai nre majaw shahte a shim lum lam a matu hkrit ai majaw rai na re” nga nna Wa Ra Zup mare masha langai tsun ai.
April shata praw 5 ya shani hkying 12:20pm hte hkying 12:45pm aten laman hta mung Mungji Ginwang Masat (10) Dap Ba, Masat (2) Dap Dung ginra kaw Hk.M.Y (363) hte Tatma (99) kata na pawng hpawm hpyen hpung n gun (100) daram hte KIA MHH hpyen hpung ni Nawng Jung hte Mung Paw lapran kaw gasat poi byin ai re lam shawng lam shi sawk ni kaw nna chye lu ai.
Ya aten hta Mungmyit Sinli Ga (Kachin-Sub-state) ginra hte jinghpaw mung ginra ni hta February shata kaw nna shani shagu gasat gala majan byin hpang wa ai rai nna lahkawng maga shada maja nga dingyang re hte matut manoi gasat poi majan mai byin ai lam chye lu ai.
