KIA Masat (4) Dap Ba ginra kata shara 2 hta gasat gala majan byin
Mungmyit Sinli Ga (Kachin Sub-state) KIA Masat (4) Dap Ba, Masat (8) Dap Dung ginra hte Masat (39) Dap Dung ginra shara 2 hta April shata praw 7 ya shani hkying 1:00-2:00pm aten daram hta, KIA hte Myen Hpyen Dap ni gasat gala majan byin ai lam na chye lu ai.
April praw 7 ya shani hkying 1:30pm aten daram hta gaw, Nam Sung kaw na yu wa ai Hk.M.Y (427) Myen hpyen hpung ni KIA ni nga ai shara de hpyen shamu shamawt htu shadut lung wa ai majaw, Mung Yu hte Lun Gam lapran kaw KIA Dung (8) hpyen hpung ni hte gasat gala majan byin ai lam, shawng lam na lit nga ai salang langai tsun ai.
Shani hkying 1:15-2:00pm aten daram hta mung, Kutkai hte Man Ping lapran na lam hpunggaw kaw hpyen Mawdaw (3) hte Kutkai mare kawn yu wa ai Dapnu (99) kata na Myen hpyen hpung ni n-gun (30) daram hpe KIA Dung (39) hpyen hpung ni hkap shingla gasat ai kawn gasat gala majan byin ai re lam chye lu ai.
Mungmyit Sinli Ga ginra hta laiwa sai February shata kaw nna ya aten du hkra shani shagu ngu na daram gasat gala majan byin nga ai rai nna, hpyen shamu shamawt masa hta hkan nna gasat gala matut byin wa mai lam chye lu ai.
