Myen Gumshem balik dap ni, PSI salawng ni hpe rim jahten sharun kau ya

                                                                   Photo Credit; FB

Myen gumshem balik dap ni kaw nna April shata 9 ya shani hta Manmaw muklum kata nga ai PSI salawng ni hpe tara nshang ai ngu hkan zing la nna jahten sharun shaza kau ya ai hte nta masha ni hpe sumla dem mat wa ai lam nga ai re hpe, Manje mare masha langai tsun shana wa ai kaw nna chye lu ai.

“Ndai PSI salawng  gaw myen mung kaw tara nshang ai, ahkun hkanse nbang ai majaw tara nshang ai rai re nga tsun ma ai, kaga skynet salawng ni hpe gaw hpa n galaw ya ma ai. Nkau mi nchye ai majaw ndum gun, n gan la kau lu ai ni na gaw shakap da ai kaw nna kajawng kaja malawk la, adup agrawp kau da ya nna nta masha ni hpe mung sumla dem mat wa ma ai” nga nna mare masha langai tsun dan ai.

Ya na zawn galaw ai lam gaw shanhte a nkaja ai shiga ni, shanhte galaw ai lawng lam ni hpe buga masha, mungshawa ni dingyang chye na nra ai majaw hkan galaw ai lam rai na re nga nna manje mare na salang langai masam maram tsun dan ai.

April 9 ya shana daw hkying 5:00pm aten hta Manje muklum kata kaw mung PSI salawng dut seng shagu hpe hkan jep nna zing la kau ya ai lam nga ai rai nna, lai wa sai April shata (8) ya shani kaw nna mung Yangon myo mare kaba hte kaga shara ni hta PSI salawng ni hpe Myen gumshem balik dap ni kaw nna rim zing la, jahten sharun kau ya ai re hpe chye lu ai.

PSI salawng hpe gaw ahkun hkanse nbang ra ai re majaw Manmaw, Manje muklum kata nga ai mungshawa ni law malawng gu gu ra ra lu lang ai rai nna shiga ni hpe aten dep madat hkaja la lu ai re hpe mung chye lu ai.