KIA Dap Ba (1), Dap Ba (4) hte Dap Ba (9) ginra ni hta gasat gala majan byin
KIA Dap Ba (9) Dap Dung (44) ginra, Nam Ya mare kaw nna pru wa ai, Myen hpyen hpung ni hpe April shata 14 ya shani hkying 11:20am aten hta KIA ni Gumtsai Yang mare baw kaw hkap gap ai kawn gasat poi byin ai lam, shawng lam shi sawk ni shana wa ai kawn chye lu ai.
KIA Dap Ba (1), Dap Dung (7) ginra hta mung, Nsai Yang hte Sum Pyi Yang lapran kaw mawdaw hte shamu shamawt hkawm ai Myen hpyen ni hpe April shata 13 ya shani hkying 11:20am aten hta KIA ni bawm hkap dep bun ai. Bawm dem bun ai shara de Myen hpyen ni hpyen garum sa wa ai majaw KIA hte matut gasat poi byin ai.
April shata 13 ya shani hta sha, Mungmyit Sinli Ga (Kachin Sub-state), KIA Dap Ba (4), Dap Dung (34) ginra, Pang Mahpyit kaw shara jahkrat nga ai Hk.L.Y (148) dap na hpyen n gun (60) daram nga ai hpyen dap hpe KIA ni sa htim gap gasat ai lam chye lu ai.
