Myitkyina ginra na shi sawk marai 3 bai rim hkrum
Myitkyina News Journal kaw na shi sawk Ahje, Christohpa hte Myitkyina Journal kaw shi sawk magam bungli galaw lai wa sai shayi Myo Myat Myat Pan ni hpe April shata 14 ya shana Myen Hpyen Gumshem ni shinggan hkying hte dum nta di sa rim woi mat ai lam na chye lu ai.
Lai wa sai March shata kaw nna Myitkyina Journal shi sawk bungli pru hkringsa taw sai shayi Myo Myat Myat Pan hpe gaw, April shata 14 ya shana hkying 6:00pm aten hta shi a dum nta kaw nan sa shang rim woi ai hta, computer, phone arung arai ni mung rim zing la ai lam, Myitkyina ginra na salang langai tsun ai.
Lai wa sai shata laman hta sha, The 74Media hte Kachinwaves shiga dap kaw na shadang La Raw hte shayi Chyang Bu hpe rim woi mat ai, April shata 9 ya shani hta mung Hpakant ginra na shi sawk Ko Nawng Yu hpe rim woi mat ai rai nna, Manmaw ginra na shisawk (1) mung rim hkrum mat ai ya aten du hkra bai dat ya ai lam nnga shi ai re.
Lai wa sai bat kaw nna Myitkyina Journal Rung hpe pat tawn da ra ai madang du taw ai re sha n-ga, shi sawk ni hpe mung dum nta di hkan tam rim taw nga ai ten re majaw, shi sawk ni yawng mung tinang a sak shim lam a matu hkrit tsang nna shi sawk bungli pru hkring sa ai ni law wa ai hte shisawk nkau mung yak hkak dutdang ai lapran grai sadi maja let shi sawk bungli hpe shakut shaja galaw nga ra ai re hpe na chye lu ai.
Mung masa shuk shanut nga ai aten hta, Myen Hpyen Dap kawn n-gun madun mung shawa ni hpe mara kata rim adup zingri, sinat hte gap sat ai lam galaw ai sha n-ga, Jinghpaw Mung kata na ginra shi sawk ni hpe mung madung tawn hkan rim zing ai lam galaw ai hte bai dat ya ai lam nnga ai majaw, mung shawa ni yawng hkrit tsang nga ai lam chye lu ai.
