KIA Dap Ba (2), Dap Ba (4) hte Dap Ba (5) ginra ni hta gasat gala majan byin

KIA Dap Ba (2), Dap Ba (4) hte Dap Ba (5) ginra ni hta Myen Hpyen Dap hte KIA ni April shata 15 ya shani gasat gala majan matut byin nga ai lam na chye lu ai.

KIA Dap Ba (2), Dap Dung (14) ginra, Namhkam mare makau kaw dai hpawt hkying 6:00am aten hta Myen Hpyen Dap, Hk.L.Y (74), Hk.M.Y (318) dap na pawng hpawm hpyen hpung ni hte KIA ni gasat poi byin ai re.

Gasat poi byin nga ai ten, Myen hpyen ni kawn Jet Fighter nbung li lahkawng hte bawm wa jahkrat, wa gap bun ai re hpe chye lu ai.

Mungmyit Sinli Ga (Kachin Sub-state), KIA Dap Ba (4) Dap Dung (34) ginra hta shamu shamawt nga ai Hk.L.Y (251) dap na hpyen hpung hte KIA ni dai hpawt hkying 7:00am aten hta kalang hkying 8:00am aten hta kalang numdaw lahkawng lang, Numlang hte Hupung lapran kaw gasat poi byin ai lam, buga masha ni kawn chye lu ai.

KIA Dap Ba (5) ginra, Alaw Bum makau grup yin shara ni hta mung gasat poi matut manoi naw byin nga ai lam chye lu ai.