Manje mare masha ni yi galaw sha nga ai Loichying Bum de Myen hpyen ni laknak kaba gap bun
Manmaw Ginwang Manje Ninghtawn, Manje mare masha ni hkarang yi galaw sha nga ai Loichying Bum de April shata 16 ya shani ka-ang hkying 12:30pm aten hta dap mying n chye ai Myen Hpyen Dap kawn laknak kaba (4) lang gap bun ai majaw, mung shawa ni hkrit tsang nga ai lam ginra masha ni tsun shana wa ai kaw na chye lu ai.
April shata 16 ya jahpawt hkying 10:00am aten hta mung, ndai laman du ai Myen manam ni kaw nna, Manje mare sinna maga Kawa Bum lagaw hku yi galaw sha nga ai, Manje mare na mung shawa marai 2 hpe lam madun rim woi mat nna, shana maga bai dat ya sai lam chye lu ai.
Mungmyit Sinli Ga (Kachin Sub-state), KIA Masat (4) Dap Ba, Masat (34) Dap Dung ginra, Yawnghtawk mare makau dap mying n chye ai Myen hpyen hpung ni hte KIA ni April shata shata 16 ya jahpawt hkying 4:00am-5:00am aten laman laja lana gasat gala majan byin ai lam na chye lu ai.
