KIA Masat (9) hte Masat (8) Dap Ba ginra ni hta gasat gala majan byin
Ga Hkyeng Bum Ginwang Masat (8) Dap Ba hte Hpakant Ginwang, KIA Masat (9) Dap Ba ginra 2 hta April shata 18 ya shani KIA hte Myen Hpyen Dap ni laja lana gasat gala majan byin ai lam na chye lu ai.
KIA Masat (6) Dap Dung ginra, Tang Gau bum kaw dap jung nga ai HK.L.Y (76) dap hte Masa Tu Kawng, Tang Gau RCM kyuhpyi bum kaw nga ai Myen hpyen hpung ni hpe April shata 18 ya shana maga hkying 5:13pm kaw nna hkying 7:50pm aten laman, KIA hpyen hpung ni sa htim gap ai majaw gasat gala majan byin ai. Gasat gala majan byin ai shara hpe KIA ni shara bai matut la da ai lam na chye lu ai.
Matut nna Masat (6) Dap Dung ginra, Hpakant Tatma Kawng kawn lagaw lam hte pru wa ai Myen hpyen hpung ni hpe KIA hpyen hpung ni jahpawt hkying 9:00am aten hta Seng Tawng hte Yuma Jade land lam numshe kaw bawm hkap dem bun ai lam chye lu ai.
Myitkyina maga kaw nna rawt wa ai, Jet Fighter nbungli (2) gaw, shani ka-ang hkying 12:55pm aten hta KIA Masat (8) Dap Ba Daju hpe bawm 2 lang wa jahkrat, wa gap bun ai lam nga ai.
KIA Masat (5) Dap Dung ginra hta mung, Pang Hkawn Yang maga kawn pru wa ai Myen Hpyen Dap, Hk.M.Y (385) dap na hpyen hpung ni hpe KIA ni Shana hkying 7:20pm aten hta Si Sak shara kaw Bawm hkap dem bun ai lam chye lu ai.
KIA Masat (2) Dap Ba, Masat (14) Dap Dung ginra, N-ga Ga maga kawn pru wa ai dap mying n chye ai, Myen hpyen hpung ni, Nam Hkam mare Lisu kawng mayan de sinat kaji kaba gap bun ai lam, shawng lam shi sawk ni shana wa ai kaw nna chye lu ai.
