Sama Ginwang sasana lahta tsang jawng sharin sara/num ni hpe sharin ladat hpungjat sharin wunkat galaw
Sama Ginwang sasana lahta tsang jawng sharin sara/num ni hpe laika sharin ladat hte san poi san ladat sharin sara hpungjat wunkat hpe Sama Ginwng sasana lahta tsang jawng gawknu kaw April shata 12 ya shani kaw nna April 23 ya shani du hkra galaw na lam chye lu ai.
Sama Ginwang sasana lahta tsang jawng hta laiwa sai 2018 ning kaw nna san poi san ladat hte laika sharin ladat nnan hpe woi galaw hpang wa ai majaw, jawngma ni grau zet tsang wa ai hte laika sharin achyin ai lam hta mung grau n-gun ja wa ai majaw awngdang lam du wa ai hpe mu mada lu ai re.
KIO uphkang ginra kata hpaw tawn ai hpaji jawng kaw na jawngma ni hpe mung, laika hpe hti matsing nna san poi htai ai ladat hku nre ai sha, sharin ladat san poi san ladat nnan ni hte sharin sa wa ai rai yang, grau awngdang lam de du wa shangun mayu ai lam, Sama Ginwang sasana lahta tsang jawng hpaji up sara kaba Sinyu Zau Jum tsun ai.
Sharin sara wunkat sharin hkamla nga ai sara/num ni yawng marai 31 rai nna, 2020-2021 ning hpaji ladaw hta hpaji sharin hkam la ai Sama Ginwang sasana lahta tsang jawng jawngma yawng marai 358 re lam chye lu ai.
