Laiza buga ramma ni a “Ramma Chyum sharin hpawng” galaw
Manmaw Ginwang, laiza Buga Hkalup Hpung Ramma Komiti kaw nna woi awn galaw ai “Ramma Chyum sharin hpawng” hpe April shata 26 hte 27 ya shani hta Laiza Muklum, Mung Seng Yang mare nawku jawng wang hta galaw la lu sai re.
“Ndai sharin hpawng woi galaw ai a marang e ramma ni chyum mungga hte seng nna grau hkaja la lu na matu hte manaw manang ramma shada kanawn mazum ai lam grau na hku hkau chyap wa na matu yaw shada let galaw ai lam re” nga nna Laiza Buga Ramma Ningbaw Lahpai Zai Dan tsun ai.
Sharin hpawng hta “Ya na Mung Masa Hte Karai Masa” gabaw hpe Dr. Layang Seng Ja kaw nna sharin ginlen ya ai. “Ramma Hte Htunghking” gabaw hpe Saranum Kaba Nding Tawng Ra kaw nna sharin ginlen ya ai rai nhtawm, “Ramma Hte Hpaji” gabaw hte Dr. Aung Ko Ko Lwin kaw nna sharin ginlen ya ai re.
laiza buga ramma komiti ni kaw nna shaning shagu woi awn galaw nga ai ramma chyum sharin hpawng re hte, maning gaw masa lam amyu myu a majaw nlu galaw mat ai raitim daining gaw shawng ningnan lang galaw ai lam re.
Laiza buga hta nga ai hpung lawk (5) shagu na ramma ni, Ja Htu kawng ramma, Mung Seng Yang ramma, Alen Bum jawng Sara/ Saranum ni hte Sama Ginwang kata na rai nga ai Nawng E Hku Buga ramma ni yawng marai 430 tup sa du sharin hkam la lu sai re.
