Myen Hpyen Dap ni gap dat ai laknak kaba si mare kaw wa hkrat kapaw ai majaw mung shawa marai (1) hkala sawng, marai (1) asak si sum mat
KIA hte Myen Hpyen Dap lahkawng maga gasat gala majan laja lana byin ai hta, April shata 29 ya shana maga hkying 3:20pm aten Gumshem Myen Hpyen Dap, Hk.M.Y (438) dap ni gap dat ai laknak kaba si Num Lang mare kaw wa hkrat kapaw ai majaw, Num Lang mare na mung shawa marai (1) hkala sawng nna, marai (1) asak si sum mat ai lam na chye lu ai.
Asak si sum mat ai wa gaw, Salang Jangma Htoi Wa asak 72 ning rai nna, Jan Marip Roi San asak 27 ning gaw hkala sawng nna, Nmawk tsi rung de htaw yu wa sai lam na chye lu ai.
April shata 29 ya jahapwt hkying 8:55am aten kaw nna shana daw hkying 5:45pm aten du hkra Salawng Kawng grup yin, Jaw Maw post mayan hte KIA Dap Dung (25) grup yin de Myen Hpyen Dap ni Jet Fighter nbungli (2) hte bawm wa jahkrat, wa gap bun nga ai lam, shawng lam shisawk ni shana wa ai kaw na chye lu ai.
Ginjaw Ginra Ginwang Ginjaw, KIA Masat (5) Dap Ba, Masat (25) Dap Dung ginra, gasat gala majan laja lana byin nga ai Alaw Bum lagaw mayan hta, KIA hte Myen Hpyen Dap ni hpyen masa naw shaja hkat nga dingyang re lam chye lu ai.
Ya aten Myen Hpyen Dap ni gaw, Myitkyina hte Mugawng lam kaw April shata praw kaw nna cycle hte hkawm sa hkawm wa re ai mungshawa ni hpe hkap jahkring nna cycle, phone ni hpe laja lana sawk jep ai sha n-ga, mying ni hpe mung ka matsing la ai lam galaw nga ai re majaw, hkawm sa hkawm wa sadi ra na lam Myitkyina mare kaba na mungshawa ni kaw na chye lu ai.
