Myen hpyen dap ni a hpyen nbungli hpe KIA ni gap jahkrat
Ginjaw Ginra Ginwang Ginjaw, Masat (5) Dap Ba, Masat (25) Dap Dung ginra de May shata praw 3 ya jahpawt hkying 9:00am aten kaw nna lanak kaba ni laja lana gap bun ai rai nna, hkying 9:30am aten hta gaw Myen hpyen nbung li hte wa gap bun ai hta KIA hpyen hpung ni kawn Myen hpyen nbung li langai gap jahkrat kau ya ai lam shawng lam shi sawk ni kaw nna chye lu ai.
Myen hpyen nbungli gaw Nmawk-Myo Tit Kung Law mare hkauna pa kaw wa hkrat ang ai hte Myen hpyen dap ni a sinat laknak kaba mung wa hkrat ang ai majaw makau grup yin hkan nga ai mungmare masha ni hkala nba hkrum hkra nna Hpunggyi langai mi mung asak si sum mat ai re lam buga ramma langai mi kaw nna chye lu ai.
May shata praw 2 ya shani hta mung Myen hpyen nbung li (3) hte KIA Masat (5) Dap Ba ginra, Salawng Kawng grup yin de bawm wa jahkrat bun ai lam nga ai re.
Masat (3) Dap Ba, Masat (15) Dap Nawng Dap Dung ginra, Nmawk-Alen Kawng kaw shara jahkrat nga ai Myen hpyen dap ni kawn May praw 2 ya shani jahpawt hkying 9:25am aten hta KIA Dap Dung (25) ginra de lak nak kaba 122mm hte (2) lang gap bun ai re lam shawng lam shi sawk ni shana wa ai.
Hpakant Ginwang, Masat (9) Dap Ba, Masat (6) Dap Dung ginra, Maw Wan lawk kaw May shata praw 2 ya shani hta shawa n gun madun nga ai mungshawa ni hpe HK.M.Y (116) kata na Myen hpyen hpung ni sinat hte gap shabra ai hta asak (33) ning re ai My We Hpyu gaw asak si sum mat ai rai nna, marai (5) gaw hkala hkrum ai re. Matai (10) jan hpe gaw rim woi mat wa ai re lam buga masha ni kaw nna chye lu ai.
