Man Je Myen Balik Dap hpe KIA ni sa gap gasat
Manmaw Muklum, Man Je Myen Balik Dap hpe April shata praw 3 ya shana hkying 8:40pm aten hta, KIA Masat (1) Dap Dung hpyen hpung ni sa gap gasat ai lam, buga masha ni tsun ai kaw na chye lu ai.
Lai wa sai bat (6) ya shani Myen hpyen Mawdaw (6) hte hpyen manam ni hpe Balik Dap kaw wa garan bang da ai masa nga ai lam, gasat gala majan byin ai hta Muklum Myen Balik Du (1) asak si sum mat ai rai nna, hkala hkrum ai ni mung nga ai re lam, Man Je mare na salang langai tsun ai.
Shana hkying 8:15pm aten daram hta, KIA Masat (1) Dap Dung ginra, Man Je hte Nazaret mare maga de Hk.M.Y (601) hte Hk.M.Y (319) dap ni kawn 60mm (10) lang gap bun ai lam nga ai.
Jahpawt hkying 9:35am kaw nna hkying 10:20pm aten laman hta mung, Nmawk-Alen Kawng kaw shara jahkrat nga ai Myen Hpyen Dap ni KIA Dap Dung (25) de 122mm (18) lang gap bun ai lam chye lu ai.
April shata praw 3 ya shani hkying 10:30am aten hta, KIA Dap Dung (44) ginra, Ka Ming kawn lagaw lam hte pru wa ai dap mying nchye ai hpyen n-gun (65) daram hpung ni hpe Dap Dung (44) hpyen hpung ni Chyawk Htu hte Ma U Pin mahkrai lapran Mashi Kahtawng hkauna pa kaw hkap gap ai kawn gasat gala majan byin ai lam na chye lu ai.
