Sinpraw jarit mayan shingni komiti hpaw shabawn dat ai zuphpawng galaw
Yu ngwi ninghkring Nhkum Htu Seng woi awn nna, sinpraw jarit mayan shingni komiti hpung hpaw shabawn ai bawngban hpawng hpe April 19 ya shani hkying 10:00am
aten hta Mai Ja Yang Muklum, Mai Ja Yang hotel kaw galaw ai lam na chye lu ai.
Ndai hkrumzup bawngban hpawng hta shingni komiti mu gun masha ni hpe lata san ai kaw, ningbaw lit hpe yu ngwi ninghkring Nhkum Htu Seng, ningtau ningbaw sara Labya La San, amu madu sara Sumlut Brang Ja, ningtau amu madu hte ka matsing, saranum Mahaw Seng Mun, kunhting saranum Nhkum Seng Awng ni hpe kata san nna, komiti malawm ( 1 ) sara Labang Ja La, ( 2 ) sara Nhkum Jat Awng, ( 3 ) Jan Mwihpu Lu Ja, ( 4 ) sara Shanghtin Tang Ji, ( 5 ) sara Marip Ah Tu ni re lam, bai nna hpaji jaw salang gaw, sara kaba Nhkum Zau Seng ningtau jawng up, Institute of Liberal Arts an Sciences ( ILAS ), hte yu ngwi ninghkring sara Li Li ( Jan Pan ) ni re lam, yu ngwi ninghkring Nhkum Htu Seng tsun ai.
Sinpraw jarit mayan shingni komiti hpaw shabawn ai a, yaw shada lam hpe yu ngwi ninghkring Nhkum Htu Seng tsun ai gaw “ Myit hkrum ai hte shingni lam hta jawm gaw sharawt lu na matu ngu, yaw shada let daini na komiti hpe hpaw shabawn dat ai lam rai sai, komiti ngu ai hpe lu ai shaloi gaw ra ai kaw mung jawm hpaji jaw hpabaw galaw tim rau rau jawm galaw gunhpai lu na matu re” lam tsun ai.
Ndai zuphpawng hta sa du shanglawm ai masha yawng marai 42 rai nna, Wunpawng Shingni Hpung Ginjaw a ningbaw yu ngwi ninghkring sumla hkrung shadang Lahtaw Zau Ding hte yu ngwi ninghkring Aura Li yan mung sa du shanglawm ai lam na chye lu ai.
Du wa na May shata 10 ya shani hta mung Sub komiti hpawng hpe matut galaw sa wa na re lam mung chye lu ai.
