Salawng Kawng grup yin hta gasat gala majan matut manoi naw byin nga
Ginjaw Ginra, Manmaw sa lam Myo Tit, Kunglaw mahkrai ntsa, Salawng Kawng (tower shadaw) grup yin hta, KIA hte Gumshem Myen Hpyen Dap ni May shata praw 5 ya shani du hkra gasat gala majan shani shana matut manoi naw byin nga ai lam, shawng lam na lit nga ai salang ni tsun ai kaw na chye lu ai.
May shata praw 4 ya shana hkying 5:00pm-8:23pm aten laman hta, gasat gala majan byin nga ai Salawng Kawng grup yin de Gumshem Myen Hpyen Dap ni Jet Fighter nbungli hte bawm wa jahkrat, wa gap garum ai lam chye lu ai.
Jahpawt hkying 4:00am-4:55am aten laman Nmawk Amyawk Dap (A.M.T) (370), Hk.M.Y (320, 387, 438) dap ni kawn sinat kaba hpan hkum hte Jaw Maw lawu grup yin de gap bun nga ai lam chye lu ai.
Mungmyit Sinli Ga, KIA Masat (4) Dap Ba, Masat (8) Dap Dung ginra, Kawng Lim hte Da Hti lapran kaw May shata praw 4 ya shani hkying 12:30pm aten hta dap mying nchye ai Myen hpyen hpung ni hpe KIA Dap Dung (8) hpyen hpung ni hkap gap gasat ai kawn gasat gala majan byin ai.
KIA Masat (6) Dap Ba, Masat (9) Dap Dung ginra ni hta mung, April shata praw 4 ya shana hkying 7:00pm aten hta Kutkai lawk (6) Man Bang makau kaw shara jahkrat nga ai TNLA, MNDAA pawnghpawm hpyen hpung ni hpe Kutkai Myen Balik Dap ni wa htim gap ai kawn gasat gala majan byin ai rai nna, Kutkai Myen Hpyen Dap kawn laknak kaba ni hte gap garum ai re lam na chye lu ai.
