KIA hte Gumshem Myen hpyen ni gasat gala majan matut byin
Ginjaw Ginra Ginwang Ginjaw, KIA Dap Ba (5) uphkang ginra rai nga ai, Salawng Kawng (Tower Shadaw) grup yin shara ni hta KIA hte gumshem Myen hpyen ni, May shata praw 6 ya jahpawt 4:00am aten kaw nna shana maga hkying 5:00pm aten du hkra laja lana gasat gala majan matut byin nga ding yang re lam chye lu ai.
Gasat poi byin nga ai shara hta gumshem Myen hpyen dap ni Jet fighter nbungli (2) hte shani hkying 11:55am aten kaw nna shana daw hkying 5:27pm aten du hkra rai yang numdaw 5 lang bawm wa jahkrat gap bun ai lam nga ai.
Nmawk kaw dap jung ai gumshem Myen hpyen amyawk dap A.M.T (370) ni mung, KIA Dap Dung (25) ginra de, dai hpawt hkying 9:30am aten kaw nna dai na de hkying 6:23pm aten du hkra rai yang laknak kaba 122mm hte (15) lang gap bun ai lam, shawng lam shi sawk ni shana wa ai kaw na chye lu ai.
KIA Dap Ba (1), Dap Dung (4) ginra, Zup Mai Yang Mare deng (16) kaw mung dai hpawt hkying 5:00am aten hta KIA hte gumshem Myen hpyen dap ni gasat poi byin ai lam nga ai re.
KIA Dap Ba (4), Dap Dung (17) ginra, Sinli kawn lagaw lam hte lung wa ai gumshem Myen hpyen hpung ni hpe dai hpawt hkying 5:30am aten hta KIA Dap Dung (39) hpyen hpung ni, Man Pying mare makau Bang Lum Mare lam kaw hkap gap gasat ai lam chye lu ai.
