Salawng Kawng grup yin kaw gasat gala majan matut byin
KIA Masat (5) Dap Ba, Masat (25) Dap Dung ginra, Salawng Kawng grup yin kaw May shata 11 ya shana daw hkying 2:30pm aten daram kaw nna KIA hpyen hpung ni hte Gumshem Myen hpyen hpung ni gasat gala majan matut byin ai lam chye lu ai.
Jahpawt daw maga gaw, Daw Hpum Yang, Da Seng mare makau Nawng Hpa kaw minutes (30) daram KIA hte Gumshem Myen hpyen hpung ni gasat gala majan byin ai rai nna, KIA Masat (25) Dap Dung ginra, Alaw Bum maga de shani hkying 10:30am aten daram kaw nna shani ka-ang aten laman, hpyen nbungli (2) hte wa gap gasat ai lam chye lu ai.
KIA Masat (3) Dap Ba, Masat (15) Dap Dung ginra, Kadaw Man Da Bum hte KIA Masat (27) Dap Dung ginra, Madang Yang shara ni hta mung, May shata 11 ya shani gasat gala majan byin ai hta, Madang Yang kaw Jet nbungli (2) hte wa gap gasat ai lam nga ai re hpe chye lu ai.
Ya aten Gumshem Myen Hpyen Dap kaw nna Alaw Bum Hpyen Dap hpe bai zing la lu na matu KIA Masat (25) Dap Dung ginra, Alaw Bum lagaw mayan hta Myen hpyen n-gun (500) daram shadu da ai lam, shawng lam shisawk ni kawn chye lu ai.
