Man Je mare makau Madang Yang kaw gasat gala majan matut byin nga
KIA Masat (3) Dap Ba, Masat (1) Dap Dung ginra, Man Je mare makau Madang Yang makau grup yin hta, May shata 14 ya jahpawt hkying 5:00am-10:00am aten laman, KIA hte Myen hpyen hpung ni gasat gala majan numdaw (3) lang byin ai re lam, ginra masha ni shana wa ai kaw na chye lu ai.
Gasat gala majan byin ai makau grup yin ni hta, Myen Hpyen Dap kawn hpyen n-gun sa jat dingyang rai nga ai rai nna, gasat gala majan a majaw Madang Yang mare kaw wa shanu shingbyi nga ai hpyen yen mungshawa ni tinang hpyen yen camp de bai nhtang yu wa sai lam, Man Je mare na salang langai tsun ai.
Myen Hpyen Dap kawn May shata 14 ya shani Hpri Hta Bum mayan kaw Jet Fighter nbungli (2) hte bawm wa jahkrat wa gap ai lam nga ai rai nna, Man Je mare htum pa kaw dap jung nga ai Hk.M.Y (601,319) Myen dap ni kawn mare makau grup yin 105mm hkrup mara gap bun nga ai majaw, mung mare masha ni hkrit tsang nna hkawm sa hkawm wa galaw lu galaw sha yak hkak nga ai sha n-ga, aten tup sadi maja let myitru myit tsang hkrum nga ma ai lam na chye lu ai.
Ya aten Man Je mare htum pa Mandalay sa wa ai lam nmaw n-tsa hta mung, Myen Balik ni hte Myen hpyen la ni lai wa lai sa mungshawa ni hpe hkap jahkring nna Phone, Mawdaw, Cycle hte arung arai ni laja lana sawk jep ai lam galaw nga ai re hpe na chye lu ai.
