Madang Yang na Gumshem Myen Hpyen Dap hpe KIA ni sa gap gasat
KIA Masat (3) Dap Ba, Masat (1) Dap Dung ginra, Man Je makau Hk.M.Y (602) hte Ts.K.Hk (10) kata na Gumshem Myen hpyen hpung ni pawnghpawm dap jung shara la nga ai Madang Yang Hpyen Dap hpe KIA hpyen hpung ni May shata 16 ya jahpawt hkying 7:15am-7:45am aten laman sa htim gap gasat ai kawn gasat gala majan byin ai lam chye lu ai.
May shata 16 ya jahpawt manap jau aten hta gasat gala majan byin ai Hpri Hta Bum hte Madang Yang grup yin de Gumshem Myen hpyen hpung ni kawn Jet Fighter nbungli hte bawm wa jahkrat bun ai sha n-ga, Man Je mare makau kaw dap jung nga ai Gumshem Myen Dap ni kaw nna mung laknak kaba gap bun ai lam chye lu ai.
Lai wa sai May shata 15 ya shana maga hkying 5:30pm-5:45pm aten laman hta sha, Gumshem Myen Hpyen Dap ni dap jung nga ai Madang Yang Post hpe KIA ni sa htim gasat ai kawn gasat gala majan byin ai.
May shata 16 ya jahpawt hkying 8:30am aten hta mung, KIA Masat (17) Dap Dung ginra, Mung Yaw mare Hpaji Jawng kaw wa du nga ai dap mying nchye ai Gumshem Myen hpyen hpung ni kawn laknak kaba hkrup mara gap shadam nga ai lam na chye lu ai.
