Alen Bum IDP Hpaji Jawng hta boarder nga na jawngma mying jahpan hkap la nga sai

Laiza Alen Bum IDP hpaji jawng hta 2021-2022 ning jawng lung shaning a matu boarder nga nna jung lung hpaji sharin na jawngma ni a mying jahpan hpe May shata 20 ya shani kaw nna hkap la hpang nga sai lam chye lu ai.

Boarder nga nna jawng lung na jawngma ni gaw, boarder shang shabrai gumhpraw Yun (300), laika textbook hte yup ra hpun nba ni hkyen shajin sa ra na rai nna, jawng htawt lakmat yak hkak ai raiyang tinang nga ai ginra kaw na mare salang ni a madi shadaw laika hte jawng mying hkap la nga ai lam chye lu ai.

“Madung gaw hpyen yen boarder re majaw yak hkak ai ni ma hkra hpe mai byin ai made hkap la taw ai, dai ni du hkra raiyang masha gaw hpring wa sai raitim, nga shara shang ai hta hkan nna hkap la sa wa na re majaw, boarder mying jahpan bang na jawngma ni lawan sa wa yang hkrak ai” nga nna Alen Bum lahta tsang sharin sara (la boarder up) Sara Lanang Naw Myu Awng tsun ai.

Alen Bum IDP jawng hta sumtsaw sumtsan kaw na jawng lung hpaji sharin na matu yak hkak ai jawngma ni hpe sha madung tawn hkap la hpang nga ai rai nna, ni nawn ai kaw na jawng sa lung na jawngma ni a mying jahpan hpe gaw May shata 25 ya shani kaw nna hkap la sa wa na re lam chye lu ai.

Boarder kata machyi makaw hta lai nna jawng pru mat sai jawngma ni hpe gaw bai nhkap la sai re lam chye lu ai.

Alen Bum IDP hpaji jawng hta 2020-2021 ning hpaji ladaw jawng lung hpaji sharin hkam la sai tsang (6) kaw na tsang (10) du hkra jawngma yawng marai (700) daram nga ai rai nna, tsang (10) htai tawn ai jawngma yawng marai 247 nga ai re lam chye lu ai.