KIO Asuya uphkang ginra kata lai wa sai shaning ni hta tsang (10) awng shadang grau law
KIO Asuya uphkang ginra kata 2020-2021 ning hpaji ladaw tsang (10) awng/sum mahtai hpe May shata 22 ya jahpawt shapraw ai hta, daining na awng shadang gaw lai wa sai shaning ni hta na awng shadang grau law ai lam, Ginjaw Hpaji Dap kaw na chye lu ai.
KIO Asuya uphkang ginra kata tsang (10) htai jawngma yawng marai 824 nga ai kaw na jawngma yawng marai 621 htai awng ai rai nna, daining gaw lai wa sai shaning hta tsa lam shadang 75% awngdang ai re lam chye lu ai.
Ningtawn dawn jan nna masat lu ai jawngma ni gaw, nambat (1) Mungmyit Sinli Lahta Tsang Jawng kaw na Mahtu Myu Latt, nambat (2) Laiza Lahta Tsang Jawng kaw na Kareng Ji Awng hte nambat (3) Htoi Ningshawng Jawng kaw na Tubu Htang Nu ni re lam chye lu ai.
“Tsang (10) awng sai jawngma ni mung Shanglawt Asuya kaw na hpaw tawn ai jawng ni hta lata la nna lung sa wa na lam nga ai, hkrat ai ni mung matut shakut ga, Hpaji Dap kaw nna mung jawngma ni a shawng lam matu Maigan Dakkasu de du hkra myit da ya ai lam nga ai majaw, Hpaji Dap hpe kam hpa ai hte jawng lung ga” nga nna Ginjaw Hpaji Dap kaw na Sara Kaba Use Zawng Lum tsun ai.
Ginjaw Hpaji Dap kaw nna lit la hpaw sharin ya nga ai lahta tsang jawng ni gaw, Laiza Lahta Tsang Jawng, Alen Bum Lahta Tsang Jawng, Mai Ja Yang Lahta Tsang Jawng, N-gum La Lahta Tsang Jawng, Mungmyit Sinli Lahta Tsang Jawng, Nba Pa Lahta Tsang Jawng hte Htoi Ningshawng Jawng ni re.
KIO Asuya uphkang ginra kata 2021-2022 ning jawng lung ladaw a matu May shata 25 ya shani kaw nna June shata praw 5 ya shani du hkra jawng mying jahpan hta kahkyin sa wa na rai nna, June shata praw 7 ya shani kaw nna laika sharin hpang sana re lam, Ginjaw Hpaji Dap kaw na chye lu ai.
