Masat (1), (5), (8), (9) Dap Ba ginra ni hta gasat gala majan byin
Masat (9) Dap Ba, Masat (6) Dap Dung ginra, Lawng Hkang bawm yam jak rung shara kaw shara jahkrat nga ai Gumshem Myen hpyen hpung Hk.M.Y (116) dap ni hpe May shata 30 ya jahpawt hkying 7:00am aten hta KIA hpyen hpung ni sa htim gasat ai kawn gasat poi byin ai lam shawng lam shi sawk ni shana wa ai kaw na chye lu ai.
May shata 30 ya shani hkying 9:30am aten hta mung Masat (8) Dap Ba, Masat (5) Dap Dung ginra, Moe Da Ji kaw, lawu ga kaw nna lung wa ai Myen hpyen la htaw modo (2) hpe KIA hpyen hpung ni hkap gap ai kawn gasat gala majan byin ai lam shawng lam shi sawk ni shana wa ai.
Dingdung Ginwang Ginjaw, Masat (1) Dap Ba, Masat (7) Dap Dung ginra, Tang Ja mare makau kaw, sumpyi Yang kaw nna pru gale wa ai Hk.L.Y (46) hte (138) pawng hpawm Gumshem Myen hpyen hpung n gun (40) daram hpe KIA hpyen hpung ni hkying 11:30am aten hta hkap gap ai kawn gasat gala majan byin ai re hpe chye lu ai.
Ginjaw Ginra, Masat (5) Dap Ba, Masat (19) Dap Dung ginra hta mung Daw Hpum Yang kaw dap jung nga ai Hk.L.Y (142) hpyen dap ni kawn Pan Tsun Bum maga de laknak kaba 81mm (4) lang gap bun ai lam nga ai re hpe matut chye lu ai.
