KIO uphkang ginra kata hpaji jawng tsang madang gram sharai masat da
KIO uphkang ginra kata na hpaji jawng ni hta, Wunpawng Mungdan Shanglawt Asuya Hpaji Dap kawn KG tsang kaw na tsang (5) du hkra hpe lawu tsang, tsang (6) kaw na tsang (9) du hkra hpe lapran tsang, tsang (10) kaw na tsang (12) du hkra hpe lahta tsang madang hku nna 2021 ning May shata 27 ya shani kaw nna gram sharai masat da sai lam, Ginjaw Hpaji Dap kaw na chye lu ai.
Jawng tsang madang masat ai hpe galu kaba sai Mungdan ni hte shabung mayu ai raitim, anhte gaw Myen Mung Asuya hte mung arau nga taw ai re majaw jawng htawt hpaji sharin mayu ai jawngma ni a matu Myen Mung Asuya Jawng hte bung hkra jawng tsang madang masat wa ai re lam, Ginjaw Hpaji Dap Amu Madu Sara Kaba Marip Naw Htoi tsun ai.
2021-2022 ning hpaji ladaw hta gaw KG tsang kaw na tsang (5) du hkra hpe lawu tsang madang hku tatut hkrang shapraw sa wa na rai nna, 2022-2023 ning hpaji ladaw hta gaw tsang (6) kaw na tsang (9) hpe lapran tsang madang hkrang shapraw sa wa na re hte 2023-2024 ning hpaji ladaw hta gaw tsang 12 hpaji masa hpe tatut hkrang shapraw lu hkra galaw sa wa na re lam, Sara Kaba matut tsun ai.
Jawng sara/num matut shalat ai lam hpe gaw Ginjaw Hpaji Dap kawn lit la sa wa na rai nna, jawng gawk jat sa wa na lam hte seng nna gaw, seng ang ai Ginwang Ginjaw, Ginwang Pati Komiti ni hte hkri dun nna galaw sa wa matu hkyen lajang da ai lam chye lu ai.
Ya aten KIO uphkang ginra kata na jawng ni hta May shata 25 ya shani kaw nna June shata 5 ya shani du hkra jawngma mying jahpan jep jen nna hkap la nga sai rai nna, June shata praw 7 ya shani kaw nna jawng hpaw laika sharin hpang sa na re.
KIO uphkang ginra kata hpaji jawng 128 nga ai rai nna, June shata praw 2 ya shani du hkra rai yang jawng shagu jawngma 200 daram jat taw ai hpe mu mada lu ai re lam, Ginjaw Hpaji Dap kaw na chye lu ai.
