Masat (2) Dap Ba, Masat (14) Dap Dung ginra hta KIA hte Gumshem Myen hpyen dap ni gasat gala majan byin

Sinna Ginwang Ginjaw, Masat (2) Dap Ba, Masat (14) Dap Dung ginra, Daru mare dingsa kaw June shata praw 2 ya shani hta, KIA hpyen hpung ni hte Gumshem Myen hpyen dap Hk.L.Y (229) dap na hpyen hpung ni gasat gala majan byin ai lam shawng lam shi sawk ni shana wa ai kaw nna chye lu ai.

Daru mare baw kaw shara jahkrat nga ai Hk.L.Y (260) dap na n-gun (40) daram hpung ni kawn Daru mare jak li daru maga de, June shata praw (2) ya shani hkying 2:30pm aten hta, sinat laknak kaba 81mm hte numdaw (5) lang gap bun ai lam nga ai rai nna, hkying 5:00pm aten kaw nna hkying 5:30pm aten laman hta, KIA hpyen hpung ni hte HK.L.Y (229) dap na n-gun (40) daram nga ai hpyen hpung ni, Daru mare dingsa grup yin hta gasat gala majan byin ai re hpe chye lu ai.

Dai hpang Myitkyina kaw nna rawt lung wa ai Myen Jet Fighter nbungli (2) hte mung bawm (10) lang wa jahkrat gap bun ai lam nga ai re.

Mungji Ginwang, Masat (10) Dap Ba, Masat (2) Dap Dung ginra, MNDAA, TNLA hte AA pawng hpawm hpyen hpung ni nga ai Masa Ban Htang Bum de mung Gumshem Myen hpyen dap Tatma (99) kana na n-gun (200) daram htu shadut lung wa ai majaw Masa Ban Htang Bum pawt grup yin hta laja lana gasat gala majan byin ai lam shawng lawm shi sawk ni shana wa ai.

Gasat gala majan byin nga ai shara de Myen hpyen Helicopter nbungli (2) hte wa gap ai lam nga ai re hpe mung matut chye lu ai.