KIA Masat (1) Dap Ba hte Masat (10) Dap Ba ginra ni hta gasat gala majan byin
KIA Masat (1) Dap Ba hte Masat (10) Dap Ba ginra ni hta June shata praw 6 ya shani, gumshem Myen hpyen hpung ni hte KIA, MNDAA ni gasat poi byin ai lam na chye lu ai.
Dingdung Ginwang Ginjaw, KIA Masat (1) Dap Ba, Masat (4) Dap Dung ginra hta shamu shamawt chying lau hkawm nga ai, dap mying n chye lu shi ai gumshem Myen hpyen n gun (100) daram hpyen hpung ni hte KIA ni June shata praw 6 ya jahpawt hkying 7:30am aten kawn shani hkying 11:15am aten du hkra, Wa Garawt Bum lagaw kaw laja lana gap hkat ai re lam, shawng lam shi sawk ni kawn chye lu ai.
Mungmyit Sinli Ga (Kachin Sub-state) KIA Masat (10) Dap Ba, Masat (17) Dap Dung ginra hta mung, June shata praw 5 ya jahpawt hkying 8:00am aten hta gumshem Myen Hpyen Dapnu (99) kata na hpyen n gun 60 daram hte Kokang MNDAA hpyen hpung ni Nam Lawk Pa kaw gasat poi byin ai re.
Hkying 10:00am aten hta mung, Nati tawar shadaw kawng kaw mung gasat poi byin ai lam na chye lu ai.
