Masat Yan (10) Nursing Diploma hte Midwife tsi jawng hpaw hpawng galaw
Wunpawng Mungdan Shanglawt Asuya, Ginjaw Hkamja Dap kaw nna hpaw sharin ya nga ai Masat Yan (10) Nursing Diploma hte Midwife tsi jawng hpaw hpawng hpe June shata 8 ya shani hkying 10:00am aten Ginjaw Mungshawa Tsi Rung Wang Wunjat Gawknu kaw galaw ai lam chye lu ai.
Nursing Diploma tsi jawngma marai 226, Midwife tsi jawngma marai 190 yawng marai 416 tup rai nna, Tsi jawng hpaw sharin ai yaw shada lam gaw prat dep nna kung kyang ai tsi sara/num ni law law paw pru wa na matu hte mare buga na ramma ni hpe bungli jaw hpaji shalat ya ai lam re.
Daining na tsi jawngma ni gaw lai wa sai shaning hta grau law ai majaw dum nta, jawng gawk, jawngma lang arung arai ni mayak nga ai, jawng hpaw hpang sai kaw nna jawngma nnan nhkap la sai lam, Tsi Jawng Up Sarawun Sumdu Htu Lum tsun ai.
Masat Yan (10) Nursing Diploma hte Midwife tsi jawng hpe 2021 ning June shata 9 ya shani kaw nna hpaw sharin sa wa na rai nna, jawng lung ladaw 2 ning masat da ai hte pre class shata 2 laman hta Wunpawng amyusha ni chye ging chye mai ai Ninggawn Mungmasa, Rawt Malan Labau, Jinghpaw Laika Ka Htung Ka Lai, Htunghking hte Hpyen Htung Hkungga La Ra Lam hpe shawng sharin achyin sa wa na re.
Tsi hpaji hpe gaw Ginjaw Hkamja Dap magam gun ni hte shinggan na sa du sharin ya na sharin sara yawng marai 30 daram hte sharin sa wa na rai nna, daining du sa wa ai tsi jawngma ni gaw buga ginra shara shagu na Wunpawng amyusha hpan hkum lawm ai lam chye lu ai.
