Mungmasha ni Ja htu sha nga ai KIA Dap Dung ( 4 ) hte Dap Dung ( 10 ) ginra de Myen hpyen hpung ni laknak kaba gap bun
Shangaw kaw du nga ai Myen hpyen hpung ni, April 26 ya shani ka-ang hkying 12:35pm aten hta Dingdung ginwang ginjaw, KIA Dap Ba ( 1 ), Dap Dung ( 4 ) ginra,
Ulawng Yang hkran maga de Ja htu sha nga ai mungshawa ni hpe laknak kaba 12 lang hte MG-42 sinat ni hte gap bun ai lam na chye lu ai.
Dai hpang shana maga hkying 5:45 aten hta mung, dai Myen hpyen hpung ni sha, Jahpwi hpunggyi jawng kaw nna, Dung ( 10 ) ginra, Jang Yu Pa ja maw maga de laknak kaba 11 lang gap bun ai lam chye lu ai.
Ndai ginra ni gaw mungshawa ni ja htu nna, kanbau bungli galaw sha nga ai shara ni re. Myen hpyen hpung ni gaw, hka lam jasan jaseng gabaw hte ya na zawn, sinat ni hte gap bun wa ai majaw, galaw lu galaw sha yak hkak wa sai lam, dai ginra na mungshawa ni tsun ai kawn na chye lu ai.
