Bum Ra Yang hpyen yen hpaji jawng hta jawng sara, jawngma lang arung arai ni ra ahkyak nga

Njang Yang Ginwang kata na Bum Ra Yang hpyen koi yen ginra kaw hpaw sharin nga sai lawu tsang hpaji jawng hta, jawng sara, jawng nta dung lahkum ni hte jawngma lang arung arai ni ra ahkyak nga ai lam na chye lu ai.

Jawng lung hpaji sharin hkam la nga ai jawngma yawng marai 100 jan nga ai rai nna, hpyen yen htinggaw 130 jan, mungshawa yawng marai 500 jan hpyen koi yen shanu shingbyi nga ai lam chye lu ai.

Dai ginra de phone line matut mahkai yak hkak ai sha n-ga, hkawm sa hkawm wa hkrun lam mung grai yak hkak ai majaw, malu masha arung arai ni hting let la na matu grai yak hkak hkrum nga ai lam, Njang Yang ginwang kata na lit nga ai salang langai tsun ai.

“Malu masha, n-gu ni hting let la yak ai majaw malu masha hte seng nna yak hkak ai lam nga ai. Jawng sara nlaw ai zawn re ni, jawngma lang arung arai, jawng, muka ni n-gu ai majaw jawng sa jawng wa yak hkak ai lam, dung lahkum n-gu ai zawn re ni, jawng nta hpe Muka palastic hte sha galaw da ai majaw marang htu sawng ai shaloi yak hkak ai lam nga ai” nga nna tsun ai.

Bum Ra Yang hpyen koi yen ginra hta duhkra ladaw kahtet ai majaw Ma ni sha n-ga, masha kaba ni mung machyi makaw byin hkrum wa ai, tsi mawan ni mung ra kadawn nga ai lam chye lu ai.

Bum Ra Yang hpyen yen mungshawa ni gaw, laiwa sai March shata hta bai byin ai Gwi Htau majan a majaw Bum Ra Yang mare de hpyen koi yen shang wa ai mungshawa ni re lam chye lu ai.

Photo; Kumje Tu Tu