KIA Dap Dung (19) ginra hta gumshem Myen hpyen ni hte KIA ni gasat gala majan byin
Ginjaw Ginra Ginwang Ginjaw, KIA Masat (5) Dap Ba, Masat (19) Dap Dung ginra, Dawhpum Yang lam kaw June shata 18 ya jahpawt hkying 6:00am aten hta KIA hte gumshem Myen hpyen ni gasat poi byin ai lam na chye lu ai.
Gumshem Myen hpyen ni gaw, Manmaw maga de na hpyen modo ni hta hpyen n gun hte malu masha ni htaw lung wa ai hpe hkap gap sagat ai re lam chye lu ai.
Shani hkying 11:30am aten daram hta mung, Laja Yang hte Nalung lapran kaw hpyen modo hte lung wa ai Myen hpyen ni hpe KIA hpyen hpung ni gap hkap shingla gasat ai lam nga ai.
Mungmyit Sinli Ga (Kachin Sub-state), Muse kawn Kuthkai yu wa ai lam Shuhkinta makau kaw June shata 18 ya shana maga hkying 2:00pm aten daram hta modo kaba 3 sinat gap hkrum ai rai nna, modaw ahpraw langai gaw wan hkru taw ai, kadai wuhpung ni gap nat ai re gaw n chye ai lam, buga masha ni tsun ai kaw na chye lu ai.
Gumshem Myen hpyen ni gaw, Mungmyit Sinli Ga (Kachin Sub-state) hte Jinghpaw mung KIA ni nga ai shara shagu ngu na hta hpyen n gun laknak hte malu masha ni hpe ding yang ngu na htaw ginlen jahting nga ai majaw, gasat gala majan matut nna naw byin wa mai ai lam, ginra shi sawk ni kawn chye lu ai.
