KIA Dap Ba (4), Dap Ba (8) hte Dap Ba (9) ginra ni hta gumshem Myen hpyen hte KIA ni gasat gala majan byin
Wunpawng Mungdan Shanglawt Hpyen Dap, KIA Masat (4) Dap Ba, Masat (8) Dap Ba hte Masat (9) Dap Ba ginra ni hta June shata 21 ya shani gumshem Myen hpyen ni hte KIA ni gasat gala majan byin ai lam chye lu ai.
Mungmyit Sinli Ga, (Kachin Sub-state), KIA Masat (4) Dap Ba, Masat (8) Dap Dung ginra, Hu Nawng hte Namgut mare lapran kaw Gumshem Myen Hpyen Dap, Dapnu (99) na hpyen hpung ni hte KIA Masat (8) Dap Dung hte Masat (29) pawng hpawm hpyen ni June shata 21 ya shana maga hkying 3:30pm aten kaw nna hkying 4:00pm aten laman gasat poi byin ai lam chye lu ai.
Kuthkai kaw nga ai Myen hpyen dap hte Namhpakka kaw na Myen dap nig aw, gasat poi byin ai shara de laknak kaba gap bun ai lam nga ai. Gasat poi gaw matut nna naw mai byin wa ai masa naw nga ai lam, shawng lam na lit nga ai salang tsun dan ai.
Shana hkying 5:55pm aten hta mung, KIA Masat (8) Dap Ba ginra, Mu Nyin kaw dap jung ai Hk.M.Y (385) dap kawn pru wa ai hpyen la htaw modo (4) hpung ni hpe KIA ni bawm hte hkap gap gasat ai lam nga ai.
June shata 21 ya shani hta sha KIA Masat (9) Dap Ba, Masat (26) ginra, Se Zin maga na gumshem Myen hpyen htaw ai modo (1) hpe hkying 2:26pm aten hta KIA hpyen hpung ni, Se Zin hte Tamahkan lapran kaw bawm hte hkap gap gasat ai lam chye lu ai.
