Masat Yan (10) Nursing Diploma hte Midwife jawngma ni hpe chyum laika hpaji sharin wunkat galaw
Wunpawng Mungdan Shanglawt Asuya, Ginjaw Hkamja Dap kaw nna hpaw sharin ya nga ai Nursing Diploma hte Midwife tsi hpaji jawng hta sharin hkamla nga ai Masat Yan (10) jawngma ni hpe, karai mungga hte kapyawn nna chye na hkawn hkrang lu na matu chyum laika hpaji sharin ya ai wunkat hpe june shata 21 ya shani kaw nna 24 ya shani du hkra nhtoi 4 ya tup, Ginjaw Mungshawa Tsirung Wang Wunjat Gawknu hta galaw la lu sai re.
“Anhte amyusha gaw karai kasang lata la hkrum ai amyusha re hte maren tinang nan amyusha langai a lit hpe chyena hkawn hkrang ai hte karai mungga hta e kapyawn let chye na hkawn hkrang nna, laili laika ni hpe sharin la nhtawm, magam gun hpai sa wa lu na matu madung yaw shada let chyum laika sharin hpawng wunkat kadun hpe galaw sa wa ai re law” nga nna Tsi Jawng Up Saranum Kaba Sumdu Htu Lum tsun ai.
Chyum laika hpaji sharin ya ai wunkat kadun hta lakjet hku nna “ Karai Kasang Lata La Ai Amyu Langai A Lit ” ngu ai ga baw hte Dr. Layang Seng Ja kaw nna sharin ginlen ya ai rai nna, jawng ma yawng (413), magam gun marai (13) hte yawng rai yang sharin hkamla ai (426) tup re.
Matut nna gaw du wa na October shata hta mung Masat Yan (9) Nursing Diploma jawngma ni hpe jawngyu shagrau ai lam galaw sa wa na masing nga ai re lam Saranum Kaba matut tsun ai.
Masat yan (10) Nursing Diploma hte Midwife tsi jawng hpe 2021 ning June shata 9 ya shani kaw nna jawng hpaw sharin hpang taw sai re hpe mung chye lu ai.
