Sinpraw Majoi jawngma ni hpe Hkrang shala shingni hpaji sharin ya
Ginjaw Ginra, Laiza Muklum hta Sinpraw Majoi Htunghking Shingni Hpung ni kawn woi awn nhtawm, htunghking manau wang sinpraw majoi gawknu hta sinpraw majoi jawngma ni hpe hkrang shala shingni hpaji sharin ya nga ai re.
“Anhte wunpawng myusha ni gaw masha maigan mungdan hkan na zawn shingni hte seng ai sharin la mai ai, yu la mai ai shara ni, jawng ni garai nlu shi ai re. Bai nna anhte a jawng hpe mung htunghking shingni lam sharin hkam la mai ai jawng byin tai wa na hpe grai myit mada ai re.
Hpa majaw nga yang ndai hkrang shala ai baw gaw shing ni hpaji a kata kaw na re majaw, shingni hpaji hte seng nna mungkan de madang dep ai hku ginrun let, hkrang shala ai hpaji hpe sharin hkamla ai a marang e anhte myusha ni a hkrang shala ai hpaji mung grau grau madang tsaw ai de du wa na hpe myit mada let, ndai hkrang shala ai hpaji hpe woi sharin ai hku re” nga nna Htunghking Magam Dap kaw na Saranum Kaba Nding Tawng Ra tsun ai.
Hkrang shala shingni hpaji hpe Yangone kaw na Director Zin Hein kawn sharin ginlen ya taw ai re hte, ramma marai 24 tup sharin hkamla nga ai. Ndai wunkat kadun hpe June shata 17 ya shani kaw nna sharin hpang taw sai rai nhtawm yawm htum shata mi jan sharin hkamla sa wa na re.
Sinpraw majoi htunghking shingni hpung hpe lai wa sai 2006 ning kaw nna hpaw sa wa ai re.
Prat dep ka hkrang hpaji, music hpaji, Htunghking hte seng ai hpaji, wunpawng sha ni a ka manawt lam, galaw lu galaw sha lam, bu hpun mawn sumli lam, miwa ga miwa laika sharin hkaja ai lam, gawng shakyang ginsup sharin ai lam, wunpawng myusha ni a yu ngwi hpan hkum hte wunpawng madum sumhpa hkum hkra hpe mung dingyang sharin ginlen ya nga ai hpe chye lu ai.
Sinpraw Majoi Htunghking Shingni Hpung ni kaw nna gaw shingni hpaji hta rawt jat hkumtsup ai, galu kaba wa ai hte tinang a htunghking hpe nshamat kau ai sha shakut shaja ai wuhpung wuhpawng tai wa lu na matu, du wa na shaning hta asak (16) ning kaw nna (20) ning lapran na myit lawm ai ramma ni, yawm htum tsang shi awng sai ramma ni kadai raitim mung, sa du sharin hkamla na hpe grai ra sharawng nga ai lam Saranaum Kaba matut tsun dan ai.
