Pati majat jaw hpawng galaw
Htunghking Kyit Hkai Pati Lakung ni woi awn nna Pati majat jaw hpawng hpe Laiza Muklum Sinpraw Majoi Gawknu kaw June shata 28 ya shani galaw ai lam chye lu ai.
Jahpawt daw hta Salang Kaba Chyina Zau Awn (Htunghking Hte Laili Laika Magam Dap Lithkam) kaw nna Htunghking hte Ginru Ginsa Labau hte seng ai lam hpe tsun jahpra dan ai lam galaw ai.
Shana daw hta Salang Kaba Labang Doi Pyi Sa (Ningtau Ninggawn Amu Madu) kaw nna Pati Komiti shagu chye da ra ai Pati a lam, Pati shang masha langai a lam, ya aten na mungmasa lam hpe Ninggawn Mungmasa hte kapyawn nna tsun sang lang dan ai lam galaw ai re.
Htunghking Kyit Hkai Pati Lakung ni kaw nna Pati hpung kata kaw nga ai magam gun ni yawng KIO hpung pati a lam chye na hkawn hkrang wa na matu yaw shada let Pati majat jaw hpawng galaw ai sha n-ga, Hpun hkai ai lamang, Umun ginsup lamang hte shawng lam post kaw na magam gun ni hpe sa du gawan ai lamang ni woi galaw ai re lam, Htunghking Hte Laili Laika Magam Dap Ningtau Amu Madu Du Kaba Lahpai Zau Tang tsun ai.
Hpawng hta Htunghking Hte Laili Laika Magam Dap magam gun ni, Maigan Kyit Hkai Magam Dap magam gun ni hte Sinpraw Majoi ka manawt hpung ni shang lawm ai hte galaw la lu sai re.
Htunghking Hte Laili Laika Magam Dap hte Maigan Kyit Hkai Magam Dap lahkawng pawng nna Htunghking Kyit Hkai Pati Lakung hpe 2021 ning March shata hta hpaw ninghtan da ai rai nna, Pati majat jaw hpawng hpe Pati hpung shang masha jat wa ai hta hkan nna matut galaw sa wa na lam chye lu ai.
