N-ta ningnan dingshawn akyu hpyi lamang galaw hkyen ai dum n-ta na mungshawa marai 30 jan rim hkrum
Waimaw, Mungna Lawang lawk (2) kaw n-ta ningnan dingshawn akyu hpyi hpawng galaw hkyen nga ai Salang N-gau Zau Awng dum nta masha ni hte rau n-ta wang kata na mungshawa marai 30 jan hpe July shata praw (1) ya jahpawt Gumshem Myen hpyen hpung ni rim woi mat ai lam na chye lu ai.
“Dai hpawt hkying 4:22am aten daram hta Myen hpyen hpung ni dai nta wang hpe wa wang shinggrup sinat ni kapaw jahkrit rai nna, 7:00am daram hta gaw nta wang kaw nga taw ai mungshawa ni hpe hkyuk Mawdaw (3) kaw rim bang mat ai, gumgai (2) hpe Mawdaw nshang nna ngam da ai” nga nna ginra masha ni tsun ai kaw na chye lu ai.
Ya aten dai n-ta hpe zaw la da ai rai nna, Gumshem Myen hpyen la ni gaw dai n-ta wang makau grup yin hkan sin taw nga ai majaw, kadai mung nmai sa rai nna mabyin lawng lam hkum tsup hpe garai nchye lu shi ai.
Rim hkrum ai dum n-ta masha ni gaw Kahtawlik nawku hpung masha ni re lam, rim hkrum ai hta hkra hkala asak si sum ai mung lawm ai rai nna, rim hkrum ai ni hpe ya aten du hkra garai ndat ya shi ai lam, buga masha ni kaw na chye lu ai.
June shata 30 ya shana maga hkying 4:00-5:00pm aten daram hta mung, KIA Masat (6) Dap Dung ginra, Hpakant Tamahkan mare na mungshawa marai (60) daram lam hkawm n-gun madun ngut nna masha bra ai hpang ngam nga ai n-gun madun ai hta woi awn ai ni marai (4) hpe Hk.M.Y (119) dap ni kawn Mawdaw hte rim woi mat ai lam na chye lu ai.
