Gumshem Myen hpyen hpung ni mungshawa n-ta shagu shang sawk jep nna Dumhpau sinat hte gumhpraw ni rim zing la

Putao Lung Sha Yang kaw shara jahkrat nga ai Gumshem Myen hpyen hpung ni gaw Lung Sha Yang mare Nazaret buga na mungshawa n-ta shagu shang sawk jep hkawm nhtawm, Dumhpau sinat hte gumhpraw ni rim zing la kau ya ai lam, buga masha ni kaw na chye lu ai.

“July shata praw 5 ya jahpawt byin ai lam re, hpyen n-gun tsawmra mi law ai. Lung Sha Yang mare Nazaret buga na mungshawa htinggaw langai hpang langai shang nna arung arai ni sawk jep nhtawm, mung mare masha ni a Dumhpau sinat hte gumhpraw ni rim zing la kau ya ai” nga nna ginra masha langai tsun ai.

Masha rim hkrum ai lam nnga ai raitim, dum nta langai mi hta myusha hte seng ai arung arai loi sawk jep lu ai, dai arung arai hpe la kap nna dum n-ta masha ni hpe hkan tam ai lam nga ai majaw, htinggaw ting koi yen ra ai masa nga ai lam, salang wa matut tsun ai kaw na chye lu ai.

Gumshem Myen hpyen hpung ni kaw nna mare buga shara shagu de a kajawng shang sawk jep ai lam galaw nga ai majaw, mung mare masha ni yi sun hkau na kaw yup nna kan bau bungli galaw sha na matu hkrit tsang nga ma ai re.

Nazaret buga kaw mungshawa htinggaw 110 jan nga ai rai nna, dai ginra hta yi sun hkau na hpe madung kan bau bungli galaw lu galaw sha ai lam, lai wa sai ten ni hta gaw ya na zawn dum n-ta kaw hkan sawk jep ai lam nnga ai re hpe chye lu ai.